രാത്രിവണ്ടി

മൂളി ഞരങ്ങി ഇഴഞ്ഞിഴഞ്ഞ്
രാത്രി വണ്ടി ഓട്ടം തുടങ്ങി.
ഒരു ബോഗിയിൽ അഞ്ചാം ക്ലാസ്‌
പഠിച്ച സ്കൂൾ വരാന്തയുണ്ട്‌.
മറ്റൊന്നിൽ ആരോ തന്ന മിഠായി.
മുമ്പിലൊന്നിൽ മുക്രയിട്ടൊരു കാള .
ഇടയിൽ ഒന്നിൽ ഇഷ്ടക്കാരി.
പിറകിൽ ആഴമെഴുതാ കൊക്ക.
ഇന്നലെ കണ്ട സിനിമ,
കറുത്ത കള്ളൻ,
തൊണ്ടയിൽ കുടുങ്ങിയ നിലവിളി ,
വെള്ള പുതച്ച ഞാൻ,
എണ്ണിയാൽ തീരില്ല.
യാത്ര തീരാതിരിക്കാൻ
കൊതിപ്പിക്കുന്നവരുണ്ട്.
ചങ്ങല വലിക്കുന്നവരുണ്ട്.
എവിടൊക്കെയോ നിർത്താറുണ്ട്.
ചിലപ്പോൾ വൈകാറുണ്ട്.
എന്നെ ഗർഭം ധരിച്ച്‌
നാളേക്ക് ഓടുന്നുണ്ട് വണ്ടി.